Pamigunam para king Evangelio ning Ka-30 Domingo ning Karaniuan a Panaun
Jeremias 31:7-9 | Dalit 126:1-2, 2-3, 4-5, 6 \ Hebrero 5:1-6 | Marcos 10:46-52
27 Oktubri 2024
Bro. Pio Carl Dizon
Potang makatabnu tamung metung a taung ali tamu kakilala, metung karing kukutang tamu apin ing lagyu na. Mekad anyang magumpisa tamung mag-aral king elementarya, manyabit tamu pang name tag karing kekatamung unipormi ban kanita a umpisan ta lang akilala ring kekatamung kaklasi king kapamilatan ning karelang lagyu. At kabang lulwat ing pamangilala tamu karing akaklasi tamu, mikikintal karing isip tamu ing karelang ugali angga na king puntung page binanggit me ing lagyu na ning kaklasi mu, agad tamung makabanggit karing mangayap o kaya naman karing e masyadung mayap a ugali ra. Ing paralan ning karelang pamagpakilala, mayayakit king paralan a nung pakananu lang mekiabe kekatamu. Anya pin pag mikaka reunion la ring mikakaklasi, siguradung metung karing babalikdan da apin ing karelang karanasan king balang metung at metung. Balamu wari, sasampulungan ne ning lagyu ing ugali ampon pangatau na ning metung a tau.
King Mumunang Pamamasa, masala tamung akit nung pakananu yang pekilala ing Dios karing Israelita. Pekilala na ing sarili na anting Dios a mayupaya ampon mapamakalulu. Ibat king pangabihag da ring Israelita, pengaku na ning Dios a ipakit na ing kayang pakalulu kapamilatan ning mangaragul nang dapat. Mekad ing pangakilala tamu king Ginu, kaparehu ne ning pamangilala da ring Israelita; page daratang la ring mangasakit a kapagsubukan ning bie, magsantung tamu king pangadi uling sasalpantayanan tamu a ing Dios, malunusan ampon maganaka ya at isadsad na katamu angga king kapupusan da ring pagsubuk a daralanan tamu. Sasalpantayanan ta ya iting katutuan uling ing karanasan tamu mismu, patutwanan na a ing babie nang pakalulu ning Dios, tune lalagpas pa king kekatamung yadwan. Inia pin ing Dalit a Pakibat, sasabyan na naman ing karanasan tamu potang ikatamu, araramdaman tamu ing pamaging mapamakalulu ning Dios. Potang ing pangadi tamung kumayap ya i ima, mipasar ka king board exam, mayari ya i bunsu king pamagaral, o kaya naman itang misadsad tamu king patingapun, babie yang tula king kekatamung pusu. Mekad akwa tamu pang sumabing thank you Lord potang ikwa tamu ing kekatamung pangadi. Mas maging malalam ya ing tula tamu uling ing kekatamung pangadi, bunga ne ning masapsap tamung kapagnasan a pakiramdaman ne ning Dios ing kekatamung aklis. At potang ikwa tamu ing pangadi tamu, mekad mangapnu lang tula ring pusu tamu uling akikilala tamung ali na katamu likwan ning Dios libutad ning masipit tamung kabilyan. Potang panamdaman tamu a magdili-dili ta na at ali ta na agyung kumusad, papakit na ning Dios ing keyang pakalulu potang lalapit tamu kaya king pamanalangin. Kalupa nung makananu na lang tinayid ning Ginu ring Israelita manibat king pangayalipan da king Ehipto angga na king karelang pangatimaua, pakanyan na ring ipakit ning Ginu ing kayang pakalulu; king kapamilatan ning kayang pamanatili ampon pamanantabe masaya man o masipit man ing kekatamung daralanan.
Ing pamagpakilala na ning Dios anting mapamakalulu, susundu nang papakit ning Kadwang Pamamasa. Titimid nang masala a ing Dios, kapamilatan nang Jesus, ing matas a pari, pakiramdaman na ing sablang aklis tamu keya. King keyang lugud, mamilatan ya i Jesus para kekatamu king Ibpa ban kanita, mipaltutu la at miganap la ring kekatamung panalangin. I Jesus susundu nang papakit ing lugud na kekatamu uling lalapit na katamu king Ibpa. Dapot king mebasang Ebanghelyu, taliwas king pamamilatan nang Jesus ing ugaling pepalto da ring kekaldan kang Bartimeo. Nung kapilan mika oportunidad ya i Bartimeo ban kanita panamdaman na ing pakalulu ning Dios, meging balakid la ring tau. Mekad menasakit ya kapanamdaman i Bartimeo uling bulag ne pin, ala pang bisang sumaup kaya ban kanita, milapit ya Kang Jesus. Imbes na saupan de ring tau i Bartimeo a milapit kang Jesus, binawal de at petahimikan de pa. At neng kayi, pakanyan mu naman ing araranasan tamu. King panaun a tutung mangailangan kang kasaup, alang makasadyang mamie kaguian ampo oras kekatamu ban kanita, saupan da ka anya mas panamdaman tamu ing kalungkutan ampon ing pamagdili-dili. At page miraras tamu king kaniting sitwasyun, misasaldak tamu kapibabatan uling mas lalung mabayat ing problemang daralanan tamu.
Dapot, ali ya minuling bigu i Bartimeo. Libutad ning pamamawal da ring tau kaya, pigkapilitan nang lagpasan ing pamamawal da kaya ring tau at kinulisak ya pang “Anak nang David, malunus ka kanaku!” At iting pamanyalpantaya nang Jesus yang meging sangkan obat pekiramdaman ne at inulu neng Jesus. Kinalawat yang matalik i Bartimeo king kayang kasalpantayanan anya ikwa nang misadsad king kayang kasakitan. Libutad ning masipit nang kabilyan, maniwala yang pakiramdaman nang Jesus ing kayang aklis at ipagkalub na ing kayang panalangin king paralan a makakayap keya. Ing kasalpantayanan, king pakanining paralan, maging yang dalan ning mas malalam tamung pamangilala king Dios at ing pamagtiwala tamu king kayang planu. Kapamilatan ning kasalpantayanan tamu king Dios, ayayagyuan tamung kumusad king mabayat tamung pupusanan uling paniwalan tamu a kalupa ning pamakiramdam na king panalangin nang Bartimeo, pakiramdaman na la ning Dios ding panalangin tamu king paralan a nung pakananu lang lusuk makakayap kekatamu. Uling ing pamanyalpantaya king Dios, papakit nang masala ing kekatamung limitasyun na ning kekatamung pangatau ban kanita, akilala tamung masala ing pangimut ning Dios king bie tamu lalung lalu na karing panaun a manalangin tamung mikabyus tamu karing problema tamu. Uling ing upaya at pakalulu ning Dios, miraras ya king kaganapan na king kapamilatan ning kekatamung keynan. At ding kasalukuyang kapagsubukan tamu a magpapakit king kekatamung keynan, malyari la namang maging dalan ban kanita, mas tumibe tamu kasalpantayanan at mas akit ta yang masalese ing pamaging mapamakalulu ning Dios. I Bartimeo, meging dalan ya ing kayang pangabulag ban kamtan na ing pakalulu ibat king Dios. At iti mismung karanasan yang migtulak kaya ban salpantaya yang lalu king Ginu inya tikyan ne i Jesus king dalan.
King panaun a masusubuk tamu kasalpantayanan angga na king puntung ali ta ne akakit ing paintungulan pauli na ning takut ampon kapikakunwan, maging dalan ya sana ing kekatamung pamangilala king Dios a mapamakalulu ampon mapaglunus ban kanita, mika kasalpantayan tamung kalupa ning kang Bartimeo; metung a kasalpantayanang maki ganap a tiwala king ing Dios, ipagkalub na ing sablang panalangin tamu king paralan a nung makananu lang lusuk makakayap kekatamu.
