Pamigunam para karing Pamamasa ning Kaduang Domingo ning Adbiyento
Baruc 5: 1-9 | Dalit 126: 1-2, 2-3, 4-5, 6 | Filipos 1: 4-6, 8-11 | Lucas 3: 1-6
8 Disiembri 2024
Bro. Joshua Lalu
Karing Pamamasa tamu ngening Kaduang Domingo ning Adbiyento, akit tamu ibat kang Propeta Baruc ing agkatan na katamu a magsadya at magsaya uling paulian na ne ning Dios ing keyang Anak.
Makanyan mu naman king Kaduang Pamamasa ibat king Sulat nang San Pablo karing tau Filipos, agkatan na katamu, itang sabla, a linisan ing kekatamung pilubluban at alang nanu mang bakas a kasiran king lub angga king panyatang nang Kristo.
King Ebanghelyo nang San Lucas, king malambat a panaun a pamagari da ri Emperador Tiberio, Poncio Pilato a gobernador king Judea at i Caifas a pekapun ding saserdote, atyu i Juan a anak nang Zacarias king ilang, dinatang ing metung a siwalang ibat king Dios, karin ya menaral patungkul king malapit nang paniatang ning Dios. Metupad ing makasulat king libru ning Propeta Isaias a isadya ing keyang dalan, patagan na ing bunduk, itulid ring baluktut a dalan. Kalupa ning kantang “Balang kulkul tambakan ya, bunduk-bundukan patagan na, at ding sablang tau akit da ing ligaya ning Ginu”.
King kakung bie pamanyuyu Keya, aranasan ku man ing kasiran lub, milako tiwala at kapanayan pauli da ring kapagsubukan, dinatang king puntu a ali naku bisang sumuyu, dapot pauli da ring taung migtiwala at sinaup, dinatang ya ing lugud ning Apung Ginu, mekalingwan man pero mitatak king kakung isipan a ing Apung Ginu mu ing susuyuan. Linto ing kapayapan king kakung pusu at milako ing kasiran lub king oras a bala ku ala nakung kapanayan at mako na mu king pamanyuyu Keya.
Buri nang sabyan niti, gawan tana ing dapat tamung gawan, nanu ba ita? Yapin ing pamagsadya tamu karing kekatang sarili king Keyang pamaniatang, linisan ing kekatang pilubluban at magsaya tamu. Gumulut na, ilako tana ing nanu mang bakas a kasiran lub at sumisi karing kasalanan tamu, uling datang ya kekatamu karing kekatang pusu ing kapayapan at lugud ning Diyos.
