Pamigunam para king Evangelio ning Solemnidad ning Inmaculada Concepcion ning Nuan a Virgen Maria
Lucas 1: 26-38
9 Disiembri 2024
Sis. Ericka Buita
Ing Evangelio ngeni apin ing “Annunciation” o iniang tanggapan neng Maria ing Balita a maging Indu ne ning Dios, metung yang penandit ning kapahayagan ibat king Dios at pakibat naman ibat king tau. Ing mensahi ning anghel Gabriel kang Maria bilalag na ing e karaniuan a planu ning Dios para king kaligtasan ning ketawan kapamilatan ning pamikatawan nang taung Jesu-Cristo. Oini mu naman ing gaganakan at pagmasusian tamu ngening Inmaculada Concepcion – i Maria mipangagli yang alang bakas kasalanan king sepupunan nang Santa Ana a indu na. I Mariang mapakumbabang kayanakang babai ning Nazareth, mepili ya ban gampanan ing makapasubaling papil kaniting misterio. Keni akakit tamu king ing Dios gagalo ya ketang e tamu asahan at karetang mababa.
Ing mumunang pakibat at pamangutang nang Maria papakit na ing pangatau na, balamu mo itamu, karing pakibat tamu mu naman karing planu ning Dios kekatamu patie makapagmulala o e malino para kekatamu. Dapot i Maria, makabuklat ya king kaburian ning Dios, ikit tamu iti king simpli dapot buung amanu na, “Ani ku alipan ning Guinu; maliari kabud kanaku antimo ing sinabi mu,” bilalag na niti ing matibeng kasalpantayanan at tiwala na. Ing kayang “fiat” o tangu metung yang buung pamagtiwala, e man makayamut ketang aintindian neng talaga nune king buung pamagtiwala king kayapan at upaya ning Dios.
Iting Evangelio ngening Inmaculada Concepcion agkatan na katang migunam nung makabuklat tamu ba king aus ning Dios karing bie tamu. Kalupa nang Maria, panamdaman tamung e ta karapatdapat, e makasadia, o tatakut king aduan ning Dios. Dapot ing alimbawa na papakit na kekatamu a potang tinangu ta king Dios, busal na man ning keyalan kamalinawan, paluban taya ing grasia Na a magobrang mitmung upaya kekatamu at kapamilatan tamu. Paganaka na a ing planu ning Dios, a neng kayi e tamu aintindian, parati yang magdalang bie at kaligtasan.
Ing Evangelio ngeni a “Annunciation” at pati na ing pagmasusian tamung Inmaculada Concepcion papakit na naman ing upaya nang makapagbayu ning grasia ning Dios. E magdili-dili i Maria king misiun na; siguraduan ning anghel a “datang ya keka ing Banal a Espiritu.” Iting kasiguraduan paganaka na kekatamu a padala ne ning Dios ing Banal a Espiritu kekatamu patie ausan Na katamu, ban ibie ing sikanan a kaulan ing kaburian Na kambe ning tepangan at tiwala. Kabang pigugunaman taya iting Evangelio at pagmasusian taya ing Inmaculada Concepcion, mayayagkat tamung makibat karing panagkat ning Dios karing bie tamu kambe at kawangis ning kasalpantayanan, kababan, at pamaging makabuklat nang Maria.