Pamigunam para king Evangelio ning Solemnidad ning Pañgabait ning Guinu
Juan 1: 1-18
25 Disiembri 2024
Bro. Harley Manicdao
Ngening Kapaskuan, kapagmasusian ning Pangabait ning Ginu, pigunaman tamu ing Mayap a Balita; Ing Amanu, mikatauan yang tau. Ganakan taya nung makananu yang mekisanmetung ing Amanu kekatamu. Mayakit king Evangelio nung makananu yang mayupaya ing amanu, lalu na nung ing Ginu ya ing migsalita. “Words are powerful” ada pin king kesabyan.
Agpang king Evangelio nang San Juan, ing Amanu atyu ne bayu pa melalang ing yatu, at nung nanu ya ing Dios, makanyan ya ing Amanu—tune ping mayupaya. Dapot ninu wari ing Amanung mikatauan tau? Apin ing Ginu tamung JesuKristo, a manibat pa king kamumulan, atyu ne, kambe ning Ibpa ban abayan nakatamu.
Inya sana’t paniwalan taya ing sablang Amanu ning Dios, uling ding Keyang Amanu tutu lang mangapalyari at ita ing katutuan. Tinubud ne ing keyang Bugtung a Anak para kekatamu, ing Divino Verbo a mekisaut kekatamu.
Keni king yatu, ing amanu ya ing magagamit ban miugne-ugne la ring balang metung kekatamu, ban ipasiag ing lugud at nung nanu ing panamdaman tamu king balang metung. Makanyan mu naman ing Ginu—Yang meging dalan ban pisanmetungan at miyugne-ugne tamu, Ya ing Amanung pagmulan ning lugud king yatu.
Misan makapanasakit tamung kaparang tau pauli ning amanung sasabyan tamu. Dapot nung misan, makasaup ya pala ing amanung babanggitan tamu king aliwang tau, bala mu dirinan talang words of affirmation. Atatandanan ku pa, ing metung a kaluguran sinabi na kanaku kaibat kung migdakeng Bible verse keya, “salamat king pamangamanu mu, mesikan ku lub”, kanita a-realize kung maulaga yang gamitan ing Amanu ning Ginu ban munye kapanayan king aliwa. Words are powerful, but God’s Words are more than powerful. Tutuparan Na nung nanu ing sasabyan Na, babie Na nung nanu ing kailangan da ring anak Na—ing Ginu tamung JesuKristo a mitmu king kamalan, ing kamalan a mangaintulid mung bukud para Keya.
Mananu na sanang ing Amanu ning Ginu, mandatila ya king pusu tamu, at ita ing maging sangkan ban lunto ing sala king pilubluban tamu, ing salang agamit tamu patse daratang ing karalumduman, uling ing Ginung JesuKristo—ing Amanu, ing migdalang saslag a sala king tau at ikatamu kalupa nang Juan ing maging patutu king sala ning Amanung mikatauan tau.