Pamigunam para king Evangelio ning Ka-29 a Domingo ning Karaniuan a Panaun
Marcos 10:35-45
20 Oktubri 2024
CEAQ
“Kontroladu ke yan”, “Akung maki-‘kontrol’ ken” – manawa pin king panamdam nung ikang tatalan karing bage-bage o ikang maki-‘kontrol’ king segana-gana. Ikang mag-‘mandu’, aliwa ya king panandam, ating seguridad at komportabli ing bili. Inia pin maburi ta lang ko-kontrolan ding kaburian tamu, samasan ing paintungulan ketang paralan a buri tamu at siguraduan ing kabilian king kasalungsungan. Iting anti kaniting paralan, neng kayi e taya apapansinan dapot atin yang babie maragul a e masanting a epektu king bie tamu. Kokontrolan at tatalnan tamu nung nanu la ring bage buri tamu. Tatalnan taya ing oras tamu ketang buri tamung gawan. Ka-‘kahun’ tala ring tau ketang nung makananu talang buring akit at ketang paralan a nung makanu tamung ating akakua karela.
Buri tamu itamung mag-‘kontrol’ at tatalan pelalung itang ala pa man susubuknan tanang kontrolan antimo ring alagad a Santiago at Juan. Wapin naman, e da na buring maging komplikadu ya pa ing paintungulan, keta ta nang tambing deretsu at siguradu. Baka sakaling a-‘kontrol’ at atalan tala naman dening puestung a reni – “…paintulut mu sa ing makalukluk kami king banda mung wanan at kayli.” Neng kayi, anti tamu mong dening mikapatad, mangontrol at tatalan karing dakal a bage king bie pelalung detang daratang pamu. At neng kayi e mu reng bage bage makapadurut kekatamu antimo ring pera, pamangan, imalan o aliwa pang bage nune pati na reng tau, kokontrolan tana, lalawan la ketang kabilian da at mimimua tamu potang e la sasang-ayun kekatamu. Maburi tamung tatalan – tatalan upaya, at e tamu bisang tabili, matigik a matigik ing talan nung upaya at sikanan ing pisasabian. Mitatakutan tamu potang e ta na la agyung kontrolan, potang e tano agyung talnan karing gamat tamu. Tatakut tamung itabili la ring bage at panugaling akasanayan tana. Tatakut tamu potang ding taung tatalnan tamu migbayu na la panugali. Makatakut ing tabili, manawa ing tatalan at mangontrol.
Ing Evangelio ngeni paganaka na a ing pamangontrol, ing e bisang magtabili makasira yang bie at relasiun. Ring aduang alagad king Evangelio, king kaburian dang kontrolan at talnan ring puestung buri da, e da na aganaka ing atin la palang kayabe pang aliwang alagad. Ikua ra pang minimua karela ding kayabe ra, mika-pisasabian pa. Potang itamung mangontrol at buri tamung siguradu yang siguradu ing puestu tamu, akakalinguan tamung balikdan a kikiak no pala ring kapatad tamu, ring kalulung mangailangan, retang makakalinguan na. Potang kokontrolan tamu ring bage bage ketang buri tamu mu, karin ating mika-pisasabian, palmura at kamua. Milalako ing kayapan tamu anting tau. Sisiran tamu ing bie at kalayan o katimawan.
Tuturu na ka tamu ning Guinu ngeni – “‘Tabili me pa yan”, ibuklat tala ring palad tamu ibat king matigik a pamanalan karing bage kokontrolan tamu ban kanita makasulung tamung masalusu. Ing metung a indu, datang ing puntu ing itabili ne ing talan na king anak na ban mabiasa yang talakad ing anak king sarili nang bitis. Masakit ing magtabili pero ating bungang mayap a makapanaya. Ing Dios Ibpa, tebili Ne ing kabubugtungan Nang Anak, peparala Ne king yatu ban maging Talapagligtas na niti. I Kristo mismu, tebili Ne ing bie Na ban miligtas la ring sabla.
Tutu pin, potang itamung tatalan at mangontrol, siguradu at komportabli dapot idala na katamu niti king pamagdili-dili at kalungkutan. Tuturu na katamung Kristo ing tabili tamu ing matigik a talan, ibusni la ring palad at tanggapan ta la ring bage sidia ning Guinu kekatamu at aliwa ring bage kokontrolan tamu. Neng magtabili, masakit, e malagua dapot gawan na katamung tune mabie at ating tiwala king Dios a tatalan karing bie tamu.
Ustu na ing matigik a talan karing sarili tang bie at karing bie da ring aliwa. Paburen tana mang ing Guinu Yang talan kekatamu, payapang magtiwala ing atiu tamu king palad Na. Payapang makiramdam king siwala Na – “‘Tabili me pa yan”, Akung talan keka at e ka mipaburen. Makasadia na ka mang tabili?
🥰