Pamigunam para king Evangelio ning Ka-33 Domingo ning Karaniuan a Panaun
Marcos 13: 24-32
17 Nobiembri 2024
Sis. Maureen Briagas
Siguradung ikatamu ngan minabut na king puntu o sitwasyun a nung nukarin pane ta’ng kukutang ing “kapilan?” Malyaring uli na ning kekatamung kaynipan, o kaya uling panamdaman tamung masyadu nang malwat ing kekatamung pamanenaya king panyatang na ning metung a bage. Iti akukutang taya ali mu karing kapara ta’ng tau nune pati na rin king Apung Guinu.
Patse atin tang anyaran a bage, materyal man o ali.
Patse manyad tang kapasnawan libutad da ring kekatamung pagdalanan king biye.
Patse atin tamung pangadi, maragul man a bage o ali.
“GUINU, KAPILAN?”
Maralas tayang kukutang iti lalu na patse panamdaman tamung malambat bayu na ibye ing pangadi tamu at patse bala tamu ring kekatamung pangadi ali nala mipakibatan.
King kekatamung Ebanghelio para kaniting Domingo, sasabyan na king alang mikibalu metung man king paniatang na ning aldo o oras a nung nu ya datang at magpakit ing Anak ning Tau, at ing bukud mung mikibalu apin ing Ibpa tamung atiu banua. Itamung talasalpantaya, siguradung manenaya tamu king panyatang ning aldo a akit taya ing kekatamung Guinu. Manenaya tamu king panyatang da ring malagung bage king biye tamu. Manenaya tamung pakibatan na la ring pangadi tamu. Papakit na ning Ebanghelio a iti ing ulaga ning pamanenaya. Posible la man ring bage areti o ali.
King pamanenaya karing masanting a bage a anyawaran tamu, e tamu rin aiwasan ing dumalan karing miyayaliwang kasakitan king bie. Maralas tang aiisip ing sumuku namu at misan e ta na balu nung non taya ilugal ing sarili tamu. E ta na balu nung atin pang kapanayan at nung isundu tamu pa ing pamanenaya. Daranasan tamu ngan iti, ing manenaya at magkasakit o maliligalig kabang manenaya.
THERE IS HOPE IN WAITING.
E tamu milalako kapanayan. Uling king kekatamung pamanenaya, dakal la ring masanting a bageng manenaya.
Ring kekatamung “Lord, kapilan?” siguradung mapalitan lang “Lord, finally!”
There is nothing impossible in God who makes all the impossible things possible.
In God’s perfect time.
Datang mu rin, posibling malwat mu pin dapot datang at datang pa mu rin.
