Pamigunam para king Evangelio ning Solemnidad ning Guinu tamung Jesucristo, Ari ning Meto Sikluban
Juan 18: 33b-37
24 Nobiembri 2024
Bro. John Carlo Galang
Atin kung kakilalang pamilya a balamu perpektu la bili king panlual: masaya, masaplala, at manawa la bili. Pero nung lawan mung masalese, atin la palang kulang. Busy la ring balang miyembru king sara-sarili rang agenda—ala nang oras para karing aliwa. Potang mangan la, malagad lang misabi-sabi. Neng ating problema, sara-sariling solusyun. Oita, aliwa i Kristo ing sentru ning pamilya.
Kitnan neng Pilato i Jesus, “Ika ing Ari da ring Judio?” Mekibat ya i Jesus, “E ya king yatu ing kanakung kayarian.” Keni, papakit nang Jesus a ing Keyang pamaging Ari e re kalupa ring ari king yatu – e ya tungkul king upaya, kualta o posisiun. Ing Keyang Kayarian manalumpakan ya king katutuan, lugud, at kasuyuan. Dapot ing kutang, ninu ing Ari karing bie tamu? Isipan taya ing aldoldo tang pamibie-bie. King pamilya tamu, ninu ing tutukian tamu? Maralas, una tapa ing obra, ambisiun o ring sara-sarili tang planu. Misan, maging ari la king bie tamu ring pera, tagumpe, o maka-yatung tula – dakal tapa oras king Facebook, Instagram, Netflix, ampon Tiktok kesa king pakisabian taya ing Dios o ring pamilya tamu. Inia sa’t ngening pagmasusian taya ing Solemnidad nang Cristong Ari, masanting ing ikutang tamu: nukarin ya i Jesus king bie tamu? Maka-sentru ya ba o akalinguan tane king libutad na niting malisuas a yatu?
King bie tamu, dakal tamu pantunan: tagumpe, kasaplalan, at tula. Dapot nung alayu i Kristo keng pusu tamu, ring egana-ganang areni, pansamantala la mu. I Jesus ya ing Ari a e diktador nune lulugud; e ya magari ban mung magpasikan nune ban sumuyu. Nung i Kristo ya ing Ari ning bie tamu, mibayu la ring panlalawe tamu. Ing familia tamu magi lang mas malapit, tumibe ing pamisanmetung, at ing lugud tune yang panamdaman. Ngening Solemnidad nang Cristong Ari, lawan tala ring sarili tamu. Nukarin ya ing lugal nang Jesus king bie tamu? ‘Ya ba ing Ari a tutukian at luluguran tamu, o Ari yamu king lagyu? Ing tune pamagari nang Kristo mayakit ya king pakibat tamu king kayausan na: mibie-bie king katutuan, tapat a lugud, at sumuyung e manayang nanu mang kapalit. Magi ya sang paganaka ing aldo iti para kekatamu a tanggapan taya i Kristo e mu bilang Ari ning Meto Sikluban nune pa naman antimong Ari da ring bie tamu. King anti kaniting paralan, tune yang magari ing kapayapan, lugud, at katuliran – e mu karing sarili tamu nune pa naman karing pamilya at komunidad tamu.
