Pamigunam para king Evangelio ning Fiesta ning Nuan a Virgen ning Medalla Milagrosa at Miercoles de Rojo (Red Wednesday)
Lucas 21:12-19
27 Nobiembri 2024
“Mitauli na ku ba king Milagro?” “Am I too late for a miracle?” – Oini ing kutang nang Mirabel king pelikulang “Encanto”. I Mirabel kabilang ya king e karaniwan a familia, ring Madrigal at agpang king pelikula, makatuknang la king metung a makapagmulalang bale a mayayaus “Encanto”. Karin king baleng ita, ring anggang anak a mibait ibat king familia Madrigal, mipagkalaman lang makapasubaling regalu o king amanung Ingles – “Magic”, atin la ngan puera mu i Mirabel inia akutang ne nung mitauli ne ba king milagro? Uling ala yang “extraordinary powers”.
Ing kutang nang Mirabel, mapaliaring kutang taya naman. “Mitauli na ku ba king Milagro?” At ing kutang a iti, mayayaninag ya king Evangelio ngeni. Medyu makatakut ya datang ing Evangelio ngeni. Lawen taya saguli: ing Guinung Jesus nganang mengamanu – “pandakpan da kayu at ligaligan!” “Litisan da kayu pauli Ku!” “Agyang ding pengari yu, kapatad, kamaganak at kakaluguran ipanganyaya ra kayu!” Oini ing mas masiri: “Ipapate da kayu”, “Pikasaman da kayu uli ku.” E makatakut? Anggang babasan taya mu, manamdaman tang karug. Nukarin ing milagru keni? Balamu ata ala.
Dapot ing kapagmasusian tamu ngeni, yang magdala kekatamu king milagru. Pag-fiestan taya ngeni ing Virgen ning Medalla Milagrosa. Iting debosiun king Virgen, pasulungan taya king kekatang Parokya. Ing Virgen a migkalam milagru karing magdebosiun king Medaliang binie na. Tutu, dakal karing devotos ing tinanggap milagru. Inia sa’t nung iyugne taya king Evangelio ngening aldo, busal da retang makatakut at makakarug a amanu a selita ning Guinung Jesus, atin pa mu ring milagru! Kayari nong binanggit ning Guinu retang makatakut a amanu, binggit na naman ing “Ipanatag yu ing lub yu”, “e ko paybalisa”, ya mismu sinabi na ing e no paburen retang magpatutu kaya. At ing pekamakapasno siguru karing abanggit na yapin ing “Dapot metung man king buwak yu alang mabating” busal da ring abanggit nang kasakitan. Kailangan mu ing maging matatag, ing maging mapibabata. Oini ing milagrung pantunan tamo – busal da ring dakal at e mabilang-bilang a kasakitan ning bie, e na kata lakuan ning Guinu. E uari iti mu rin ing bibitasan ning Virgen? Karetang magsulud Medalya Milagrosa, babie na ing pamanantabe na. E ya milagru ita?
Red Wednesday mu naman ngeni, gaganakan tala ring Cristianong mayayalipit pauli ning kasalpantayanan da. Deni magkasakit la pero manatili lang tapat kang Cristo. Yapin ing Milagru.
Inia sa’t karing penandit a panamdaman tamung ala nang milagrung maliliari karing bie tamu uling purus nang makatakut, makakarug o masakit ring araranasan tamu, ganakan tamu nung makananung akakua tamung milalabas kareni, ganakan tamu ring penandit a maging matatag tamu, e mu uli ning pansarili tang sikanan nune uli ning Guinu. Ing lunus ning Guinu milagru ya. Ing antabe at panalangin ning Virgen milagru ya. Ing katatagan busal ning kasakitan milagru ya.
E tamu isipang mitauli tana king milagru uling kalupa nang Mirabel ketang abanggit kung pelikula, mepupus ya ing kuentu iniang pauli nang Mirabel, misasanmetung ya ing familia na a dinalan e pamikakaintindi. Oita ing milagru o “magic” nang Mirabel, ikua neng abuu pasibayu ing familia.
E tamu migaganaka, e la magigisan ring milagru ning Guinu karing bie tamu. Mananu na sanang ing Virgen Milagrosa saupan na katamung lalung akit reting milagru at itamu mismu, magi tamu sanang milagru a pantunan da ring aliwang tau king karelang bie.
