“Balu me? Kilala me?”

Pamigunam para king Evangelio ning Kapiestan nang San Andres Apostol, ing Patulunan ning Parokya at Balen ning Candaba

Mateo 4: 18-22

30 Nobiembri 2024

Bro. Lloyd Andrei Pelayo

Malagwang sabian ing balu tane ing metung a tau base mu karetang ditak a ikit o dimdam tamu tungkul kaya. Dapot ing manatiling kutang, nu kalalam ing balu tamu tungkul kaya, o king mas malagwang amanu, tutu taya kayang kilala?

Y San Andres, bayu ya pa man meging apostol nang Hesus, meging ya pamung disipulu ning pisan nang Hesus, y San Juan, ing Talapaminyag. Siguradung dakal ne sasabian y Juan tungkul kang Hesus. Siguradung balu nang Andres a ining Kordero ning Dios a pamalita nang Juan, Iya pin ing panayan dang Mesias. Balu nang Andres kapamilatan ning turu nang Juan, ing iting panayan da, wapin Iya ing magligtas karela. Mekad king isip nang Andres at ring kerakalan, iting panayan dang Talapagligtas metung yang sundalung marangal a magdalang espada ban makamate karening lulupig karela.

Dapot ing sablang balu na, mas mirinan sala inyang y Hesus mismu Yang minaus kaya at y Hesus mismu Yang tikyan na. Kinabie ya y San Andres kayabe y Hesus anting kayang pamanangu antimong manliligo tau. King kekaba ning pamibie-bie na kayabe y Hesus, ikit nang masala at akilala neng lubus ing Ginu tang Hesus bilang mapamatawad karing makasalanan, mapagmala, mapamakayap karing masakit, mapamatula karing milalako kapanayan, at mapangadi! Ikit nang masala a y Hesus ali ya dinatang ban makipaglaban king giyerang espada nune dinatang ya ban midaun king bie na king krus.

Malagung ikutang karing sarili ta mu: “Kilala keng tagana y Hesus king mabilug kung pangatau kalupa nang San Andres o balu ke mu king kaisipan ku?” Para karing kerakalan kekatamu sapat na itang balu taya y Hesus. Sapat na ing makasimba tamu balang Dominggu. Sapat na ketang makapangadi tamung rosaryu aldo-aldo. Sapat na itang mekasimba at akumpletu ta la ring missa novenario. Dapot nung tutu tayang patulunan i San Andres, sana pakyapusan tamu ing depat na. Mas asabi tamung kilala taya y Hesus nung tukian tamu ing panagkat na, ing kumabie mitmung lugud karing kapara tang tau at milapit kaparang tau papunta kang Hesus. Inya pin e sapat ing sisimba tang Dominggu, magrosaryu aldo-aldo, mangumpletung missa novenario, at manalanging alang patugut, nung e ta biasang lugud at dapat mayap karing kapara tang tau, at nung kalwal ta king pisamban, matilus ta na naman sagu!

Inya pin, kambe ning kapigaganakan king kamatayan nang San Andres king metung a ekis a krus para kang Hesus, pakyapusan taya ing kekatang patulunan. Mabiasa ta sanang idaun ing bie tamu para king katutuan at para karing aliwang tau. Mabiasa ta sanang mibie-bie kikilala king Ginung minaus kekatamu ban lugud.

Y San Andres, kilalanan neng malalam ing Ginu tang Hesukristo at migit pa king balu na ing ikit na kabang kayabe ne y Hesus! Kalupa nang San Andres, e ta sana makukuntentu ketang balu ta Ya mu y Hesus nune pakiabutan ta sanang akilala ta Ya y Hesus karing balang aldo ning bie tamu.

---