Pamigunam para king Pamigunam para karing Pamamasa ning Mumunang Domingo ning Adbiyento
Jeremias 33: 14-16 | Dalit 25: 4-5, 8-9, 10, 14 | 1 Tesalonica 3: 12 – 4: 2 | Lucas 21: 25-28, 34-36
1 Disiembri 2024
Bro. Charles Meneses
Karing Pamamasa tamu ngening aldo, mayakit la king mumuna ring pangaku ning Guinu at ring bage-bage a maliari karing tauli nang aldo ning pamanukum. King kantang “You Are Mine”, metung karing linya na yapin ing “Do not be afraid, I am with you. I have called you each by name. Come and follow Me, I will bring you home, I love you and you are Mine”. Keni abasa tamu ring mapilan karing pangaku Na at kaburian ning Guinu ing bayu ing tauling pamanukum, makiramdam tamu king Kayang aus, e tamu tatakut, at kaluguran Na katamu.
Maralas, malagua tamung mangaina at milako kapanayan lalu na karing pekamababang dake da ring bie tamu. Mamie ya iting kasakitan king pusu at kaisipan. Inia misan, mipapakutang tamu, “Guinu, ot maliliari pu ini kanaku?” Dapot e tamu balu, susubukan Na katamu pala. Susubukan nung matibe ya ba ing tiwala at kasalpantayanan tamu at pauli na mu rin ning akakalinguan ta Ya at ring mangalagung kalam a babie Na.
Ing bie tamu mibie yang ating sala a maralas darala ta naman king karalumduman, ring lugal a e makayama king panlalawe ning Dios dapot ausan Na katamu pamurin ban muli king bale Na. Tatanggapan na ing keinan tamu at kasalanan anggang man neng kayi, itamu mismu ing makipasari kareti.
Ya mu ing tune kapayapan karing kaguluan king panlual o kilub na man ning bie tamu, ing kapainawan karing tangis a e ra akakit ring aliua, at karing anggang makasalikut a pagal a Ya mu ing makapagpakayap pauli ning Kaya tamu manibat na kanita angga man ngeni.
