Pamigunam para king Evangelio ning Kapat a Domingo ning Adbiyento
Lucas 1: 39-45
22 Disiembri 2024
Bro. Yuan Dela Peña Dela Cruz
Misan king bie, daranasan tamu ngan pu siguru ing kalungkutan o kabiguan pauli na ning bage o pagdalanan a e mamye kaligayan kekatamu. Dapot, potang ikatamu, makaranas tamung kalungkutan at kabiguan, maus tamu king kekatamung Indu, i Maria! Uling i Maria, potang ausan taya at manyad saup, antimanu, panamdaman tamu ing keyang lingap at masabal kekatamu.
Antimo nung makananu yang minta king balayan na ning keyang pisan, i Elizabeth, ala yang dadalan regalu para king keyang pisan, nune magdala yang Mayap a Balita. I Elizabeth, pinuri ne i Maria at ngana keya, “Nuan ka karing sablang babai at nuan Ya ing bunga ning kekang atyan!” Uling penamdaman na ing tula na ning Anak nang Maria inyang dimdam ne siwala. Ing anak king sepupunan nang Elizabeth, memanlundag ya king tula at saya pauli ning balita nang Maria king keyang indu. “Ninu yaku para dalawan na ning Indu na ning kanakung Ginu?” Nganang Elizabeth kang Maria.
”Mapalad ka, Maria! Uling menalig ka at meniwala king planu na ning Ginu para keka!”
Kawangis nang Elizabeth, potang panamdaman taya ing presensia na ning mal a Indu, mitutula tamu at magsaya, at maging mababa lub. Mapalad tamu uling malingap ya ing Indu ning Dios kekatamu! Lalung lalu na king libutad na ning pagdalanan tamu king bie, magpakumbaba tamu kang Maria. Mitutula tamu at magsaya, kalupa na ning anak king atyan nang Elizabeth, i Juan!
Kawangis da ring mi-indung i Elizabeth ampon i Juan, magsaya tamu, at mitutula uling mapalad tamu, padala ne ning Ginu tamu ing Keyang Indu para maging “comforter” tamu king bie, magpasalamat tamu uling atin tamung indung pane maka-agape ampon makasadiang mantabe kekatamu! Iya ing maging “consolation” tamu libutad ning kapagsubukan a daratang kekatamu.
Ngening panaun na ning Pasku, tanggapan taya ing regalu na ning kekatamung Indu para kekatamu, apin ing keyang Anak, i Jesus! Tanggapan tayang makabuklat pusu! Ing regalu nang Maria kekatamu, apin ing peka-“the best!” a tagimpan a atanggap tamu, alang materyal a bage ing makapante king atanggap tamu ibat king kekatamung Indu.
Tandanan tamu, e taya tune kaluguran ing Ginu nung e taya kaluguran ing Keyang Indu. I Maria, atin yang lugud antimo ning metung a ima, anya magpakumbaba tamu kang Maria, uling ing Ginu, kaluguran ne ing Keyang Ima at pakiramdaman Na ing dadalangin na Keya.
“Ninu yaku para dalawan na ning Indu na ning kanakung Ginu?”
To Jesus, through Mary!
