King pamamupus ning terminu nang Among Jojo anting Kura Paroko ning Parokya nang San Andres Apostol king balen ning Candaba, gaganakan, pagmasusian at pasalamatan na ning mabilug a komunidad ring dakal a bageng inambag na para king ikasulung ning kasalpantayanan, kapanayan at lugud da ring talasalpantayang Candabeño. Malugud ta lang babalikan ring sablang dinake na para king Parokya at king komunidad.

Penimunan na ing pamaglarin king pisamban, ing Parish Conservation at Restoration lalung lalu na king panaun ning Pandemia. Busal ning kasakitan, sinopan na kata pa mu ring sumulung king kasalpantayanan. Libutad ning pandemia, king tahimik at taimtim a paralan, sindu no pa mu rin ring kapagmasusian ning kasalpantayanan tamu.

Kayabe tayang miglakbe king kayausan ning mangubie Papa Francisco, ing “Synod on Synodality” at ing metung karing meging bunga na niti yapin ing panga-palual ning kekatamung Pastoral Plan – ”Balayan a Mipanuanan, Balayan a Makiramdam, Balayan a ating Masabal”.

Penimunan no ring miyayaliwang programa at proyektu: ing ”CandaBanal” neng Daun, ring pamamie kasaupan karing kapatad tamung lakuas a mangailangan, ing ”Aldo nang San Andres” at ring Aldo da ring Patrun da ring Brgy., ”Limang Siglu, Limang Parokya, CandaParokya” iniang 2021 – 500 Years of Christianity in the Philippines, ing “Gawad San Jose” iniang 2021 – Banua nang San Jose, ing pamagpakilala king devocion king Virgen Milagrosa, ing ”CandaPari”, ing Among Mar Educational Assistance Program, ing pamagmasusi king 2025 – 450 Years of Evangelization in Candaba, ing pamaglarin king kumbentu a meging ”Among Doy Austria Bale Pari”, ing Lubenas ning Pasku, at ing pamagmasusi king “Season of Creation”. Inantabayanan na katamu king Cruzada ning Virgen, Dalo Balen, karing miyayaliwang Exhibits, king Ordinasiun nang Among Maverick at karing miyayaliwang programa da ring kayanakan.

King kayang pamanantabe, asaksian tamu ing pamamendisiun karing bayung gawang bisitas ning Brgy. Paralaya at Brgy. Pescadores. Minantabe ya naman king kasalukuyan a pamag-pagawa king Bisitas ning Brgy. Sto. Rosario at ing San Andres Apostol Catholic Cemetery.

Dakal pung salamat, Among Jojo karing inambag yu ban lalu yang sumulung ing Parokya at ing bie-kasalpantayanan da ring parokyanus, karing kekayung panalangin at amanung babie kapanayan. Deti ngan misinup la king pusu da ring balang parokyanus kambe ning panalangin ning kapasalamatan a ating metung a ”Among Jojo” a minantabe king bie da ring anak nang Apung San Andres.